സത്യം, അർദ്ധസത്യം, അസത്യം – ഈ മൂന്ന് വാക്കുകൾ നമ്മുടെ ദൈനംദിന ജീവിതത്തിലും, പ്രത്യേകിച്ചും വിവരങ്ങൾ കൈകാര്യം ചെയ്യുമ്പോൾ, വലിയ പ്രാധാന്യമർഹിക്കുന്നു. ചിലപ്പോൾ ഒരു പ്രസ്താവന പൂർണ്ണമായി സത്യമായിരിക്കാം, എന്നാൽ അതിൻ്റെ അവതരണ രീതി കാരണം അത് തെറ്റായ സന്ദേശം നൽകിയെന്നും വരാം.
നാലു വർഷമായി ഒരു കപ്പലിൽത്തന്നെ ജോലി ചെയ്തുവരികയായിരുന്നു ഒരു നാവികൻ. തൻ്റെ ജോലിയിൽ അയാൾ എന്നും വിശ്വസ്തനും അർപ്പണബോധമുള്ളവനുമായിരുന്നു. എന്നാൽ ഒരു ദിവസം, അയാൾ അല്പം മദ്യപിച്ചു. മദ്യലഹരിയിൽ മുങ്ങിയ അയാൾ രാത്രി ഡ്യൂട്ടിക്ക് കപ്പലിൻ്റെ ഡെക്കിൽ വരാതെ മുറിയിൽ കിടന്നുറങ്ങി.
കപ്പലിലെ ദിവസേനയുള്ള പ്രവർത്തനങ്ങൾ രേഖപ്പെടുത്തുന്ന ബുക്കിൽ ക്യാപ്റ്റൻ ഇങ്ങനെ എഴുതി: "നാവികൻ ഇന്നലെ വളരെയധികം മദ്യപിച്ചിരുന്നു."
നാവികൻ ആ കുറിപ്പ് വായിച്ചു. ഇത്തരമൊരു രേഖപ്പെടുത്തൽ തൻ്റെ മുമ്പോട്ടുള്ള ജോലിയെയും ഭാവിയെയും ബാധിക്കുമെന്ന് അയാൾക്ക് അറിയാമായിരുന്നു. അയാൾ ഉടൻ തന്നെ ക്യാപ്റ്റനെ സമീപിച്ച് ക്ഷമാപണം നടത്തി. താൻ ചെയ്ത തെറ്റ് ഏറ്റുപറഞ്ഞ ശേഷം, തന്നെക്കുറിച്ചുള്ള പരാമർശത്തിനോടൊപ്പം ഇത്രയും കാലം താൻ മദ്യപിച്ചിരുന്നില്ല എന്നുകൂടി ചേർക്കണമെന്ന് അയാൾ അഭ്യർത്ഥിച്ചു. എന്നാൽ ക്യാപ്റ്റൻ വഴങ്ങിയില്ല. "ഞാൻ എഴുതിയത് സത്യം മാത്രമാണ്," അയാൾ നാവികനു മറുപടി നൽകി.
അടുത്ത ദിവസം, ആ ബുക്കിൽ കാര്യങ്ങൾ രേഖപ്പെടുത്തേണ്ട ചുമതല നാവികനായിരുന്നു. അയാൾ അവിടെ ഇങ്ങനെ എഴുതി: "ക്യാപ്റ്റൻ ഇന്ന് മദ്യപിച്ചിട്ടില്ല."
ഇത് കണ്ട് ക്യാപ്റ്റൻ ഞെട്ടി. അയാൾക്ക് നാവികൻ്റെ കുറിപ്പിൻ്റെ അപകടം മനസ്സിലായി. കാരണം, "ക്യാപ്റ്റൻ ഇന്ന് മദ്യപിച്ചിട്ടില്ല" എന്ന വാചകം, മറ്റ് ദിവസങ്ങളെല്ലാം ക്യാപ്റ്റൻ മദ്യപിച്ചിരുന്നു എന്ന് വ്യാഖ്യാനിക്കാവുന്ന തരത്തിലുള്ള ഒന്നായിരുന്നല്ലോ. ക്യാപ്റ്റൻ നാവികനോട് അത് തിരുത്തുവാൻ ആവശ്യപ്പെട്ടു. നാവികൻ ശാന്തനായി മറുപടി നൽകി: "സാർ, ഞാൻ എഴുതിയതും സത്യം മാത്രമാണ്."
ഈ കഥയുടെ കാതൽ വളരെ പ്രധാനപ്പെട്ട ഒരു വിഷയത്തിലേക്ക് വിരൽ ചൂണ്ടുന്നു. ക്യാപ്റ്റൻ്റെയും നാവികൻ്റെയും രണ്ടു പ്രസ്താവനകളും സത്യം തന്നെയാണ്. എന്നാൽ, അവ ശരിയായ സന്ദേശങ്ങളല്ല നൽകുന്നത് എന്നുമാത്രം. ഒരു ചെറിയ വാചകം, അല്ലെങ്കിൽ ഒരു വിവരത്തിൻ്റെ ഒരു ഭാഗം മാത്രം എടുത്തുപറയുന്നത് എങ്ങനെയാണ് തെറ്റായ ധാരണകൾക്ക് വഴിവെക്കുന്നത് എന്ന് ഇത് വ്യക്തമാക്കുന്നു.
വർത്തമാനകാലത്തിലെ മാധ്യമ വാർത്തകളും ഇങ്ങനെയൊക്കെ തന്നെയാണ്. സത്യമാണെന്നു തോന്നിക്കുംവിധത്തിൽ അർദ്ധസത്യങ്ങളും അസത്യങ്ങളും പ്രചരിപ്പിക്കുകയാണ്. ചിലപ്പോൾ ഒരു വാർത്തയുടെ ഒരു ഭാഗം മാത്രം എടുത്തു കാണിക്കുക, അല്ലെങ്കിൽ ചില കാര്യങ്ങൾ മറച്ചുവെക്കുക, അതുമല്ലെങ്കിൽ ഒരു സംഭവത്തെ തെറ്റായി വ്യാഖ്യാനിക്കുക – ഇങ്ങനെയുള്ള തന്ത്രങ്ങളിലൂടെ യഥാർത്ഥ സത്യം ജനങ്ങളിൽ നിന്ന് അകന്നു പോകുന്നു. നുണകൾ സത്യമെന്ന നിലയിൽ അവതരിപ്പിക്കപ്പെടുകയും, ശരിയായ സന്ദേശങ്ങളല്ല പലപ്പോഴും അവതരിപ്പിക്കപ്പെടുന്ന വാർത്തകൾ നൽകുന്നതും.
ഇത് സമൂഹത്തിൽ വലിയ ആശയക്കുഴപ്പങ്ങൾക്കും തെറ്റിദ്ധാരണകൾക്കും കാരണമാകുന്നു. ആളുകൾക്ക് എന്തിനെ വിശ്വസിക്കണം എന്ന് നിശ്ചയമില്ലാതെ വരുന്നു. പ്രശസ്ത പത്രപ്രവർത്തകൻ വാൾട്ടർ ലിപ്മാൻ്റെ വാക്കുകൾ ഇവിടെ പ്രസക്തമാണ്: "നമ്മൾ ജീവിക്കുന്നത് ഒരു പൊതുലോകത്തല്ല, മറിച്ച് നമ്മുടെ മനസ്സിൽ നമ്മൾ നിർമ്മിക്കുന്ന ചിത്രങ്ങളിലാണ്." മാധ്യമങ്ങൾ നൽകുന്ന വിവരങ്ങൾ ആ ചിത്രങ്ങളെ നേരിട്ട് സ്വാധീനിക്കുന്നു.
ഈ സാഹചര്യത്തിൽ, ഒരു പൗരൻ എന്ന നിലയിൽ നമുക്ക് വലിയൊരു ഉത്തരവാദിത്തമുണ്ട്. കേൾക്കുന്നതോ വായിക്കുന്നതോ ആയ എല്ലാ വിവരങ്ങളെയും അതേപടി വിശ്വസിക്കരുത്. വാർത്തകളുടെ ഉറവിടം പരിശോധിക്കുക, വിവിധ മാധ്യമങ്ങളിൽ നിന്ന് വിവരങ്ങൾ ശേഖരിക്കുക, ഒരു വിഷയത്തെക്കുറിച്ച് ആഴത്തിൽ പഠിക്കുക – ഇതൊക്കെ ശരിയായ സത്യം കണ്ടെത്താൻ നമ്മളെ സഹായിക്കും.
വിമർശനാത്മകമായ ചിന്ത (critical thinking) വളർത്തിയെടുക്കേണ്ടത് അത്യാവശ്യമാണ്. ഒരു വാർത്ത കേൾക്കുമ്പോൾ, 'ഇതിൽ എന്താണ് പറയാത്തത്?', 'ഈ വാർത്ത നൽകുന്നവരുടെ ഉദ്ദേശ്യം എന്തായിരിക്കും?', 'ഇതിൻ്റെ മറുവശം എന്താണ്?' എന്നൊക്കെയുള്ള ചോദ്യങ്ങൾ ചോദിക്കുക. അർദ്ധസത്യങ്ങളുടെയും അസത്യങ്ങളുടെയും കെണിയിൽ അകപ്പെടാതെ, സത്യം മാത്രം ഉൾക്കൊള്ളാനും അതിനനുസരിച്ച് പ്രവർത്തിക്കാനും നമുക്ക് കഴിയണം.
സമൂഹത്തിൽ നന്മയും സമാധാനവും നിലനിർത്താൻ ശരിയായ വിവരങ്ങൾ ഒഴിച്ചുകൂടാനാവാത്തതാണ്. നമ്മുടെ ഓരോരുത്തരുടെയും ചെറിയ ശ്രമങ്ങൾ പോലും സത്യത്തിൻ്റെ വെളിച്ചം പരത്താൻ സഹായിക്കും.
ഈ ശുഭദിനത്തിൽ, ലഭിക്കുന്ന വിവരങ്ങളെ ശ്രദ്ധയോടെ കൈകാര്യം ചെയ്യാനും സത്യം മാത്രം ഉൾക്കൊണ്ട് മുന്നോട്ട് പോകാനും നമുക്ക് കഴിയട്ടെ.
പുതിയ തൊഴിൽ അവസരങ്ങളും വിദ്യഭ്യാസ വാർത്തകളും ദിവസവും അറിയാൻ ഇപ്പോൾ തന്നെ WнaтѕAρρ ഗ്രൂപ്പിൽ ജോയിൻ ചെയ്യൂ..👇 📱https://bn1.short.gy/CareerLokam
